Toral Bayramov fərdi məşqlərə də başlayıb

25 yaşlı futbolçu Türkiyədə tanınmış fiziki performans mütəxəssisi Umut Özalpın rəhbərliyi altında xüsusi hazırlıq proqramı keçir.

Umut Özalp Türkiyə futbolunda peşəkar oyunçularla fərdi işləməsi ilə tanınan mütəxəssislərdəndir. O, karyerası ərzində Türkiyə millisinin sabiq və hazırkı üzvləri Ozan Tufan, Deniz Türüç, Yusuf Erdoğan, Ömer Ali Şahiner və Sadık Çiftpınar kimi tanınmış futbolçuların fərdi fiziki hazırlığı ilə məşğul olub.

Mütəxəssisin əsas fəaliyyət istiqamətləri futbolçuların fiziki performansının artırılması, sürət və partlayıcı gücün inkişaf etdirilməsi, dözümlülüyün yüksəldilməsi, əzələ gücü, balans və hərəkətliliyin təkmilləşdirilməsidir.

Özalp eyni zamanda futbolçuların məşq yüklənməsinə uyğunlaşması, fiziki hazırlığın düzgün planlaşdırılması və zədə riskinin minimuma endirilməsi məsələlərinə xüsusi diqqət yetirir. O, daha əvvəl verdiyi açıqlamalarda futbolçuların yüksək intensivlikli məşqlərə mərhələli şəkildə hazırlanmasının və fiziki yüklənmənin düzgün idarə olunmasının vacibliyini vurğulayıb.

Toral Bayramovun belə bir mütəxəssislə fərdi çalışması onun fiziki göstəricilərini daha da inkişaf etdirmək, meydanda sürətini, dözümlülüyünü və ikili mübarizələrdə effektivliyini artırmaq istiqamətində atdığı addım kimi qiymətləndirilə bilər.

Qeyd edək ki, “Qarabağ”ın heyətində uzun illər uğurlu çıxış edən Toral Bayramov 2026-cı ilin may ayında “Bursaspor”a transfer olunaraq legioner karyerasına başlayıb.